← Orqaga
searchTV.uz

Oʻzbekistonda reyestrga kiritilmagan sport inshootlarida rasmiy musobaqalar oʻtkazilmaydi

Oʻzbekistonda sport inshootlari hamda nodavlat jismoniy tarbiya va sport tashkilotlari reyestrlarini yuritish tartibi rasman belgilandi. Ushbu tartibga koʻra, davlat reyestriga kiritilmagan sport inshootlarida rasmiy sport musobaqalarini oʻtkazish qatʼiyan taqiqlanadi. Mazkur yangi tartib Vazirlar Mahkamasining 2026-yil 13-oktabrdagi 561-son qarori bilan tasdiqlandi. Qarorga asosan, reyestrlarga doir barcha normativ-huquqiy hujjatlar qabul qilinib, amaliyotga tatbiq etilishi boshlandi. Jumladan, nodavlat sport tashkilotlari reyestri maxsus axborot tizimi orqali yuritilishi belgilandi. Bunda tashkilotlar haqidagi barcha asosiy maʼlumotlar ochiq maʼlumotlar sifatida internet tarmogʻiga joylashtirib boriladi. Reyestrga kiritish boʻyicha kelib tushgan arizalar besh ish kuni ichida vakolatli organlar tomonidan koʻrib chiqiladi. Agar taqdim etilgan maʼlumotlar toʻliq va toʻgʻri boʻlsa, tashkilot reyestrga rasman kiritiladi. Agar taqdim etilgan hujjatlarda kamchiliklar aniqlansa, uch ish kuni ichida arizani rad etish boʻyicha tegishli qaror qabul qilinadi. Shuningdek, nodavlat sport tashkiloti oʻz xohishi bilan murojaat qilsa yoki uning faoliyati belgilangan tartibda tugatilsa, reyestrdan chiqariladi. Tashkilot shtatida malakali trenerning mavjud emasligi yoki reyestrga kiritilganidan keyin uch oy ichida sportchilar va trenerlar haqidagi maʼlumotlarni kiritmaslik ham reyestrdan chiqarish uchun asos boʻladi. Sport inshootlarini reyestrga kiritish jarayoni ham maxsus tartibda amalga oshiriladi. Buning uchun inshootning mulkdori yoki balansda saqlovchisi axborot tizimi orqali tegishli tartibda ariza berishi talab etiladi. Agar sport inshootining faoliyat turi sportdan boshqa yoʻnalishga oʻzgartirilsa, obyekt foydalanishga yaroqsiz deb topilsa yoki mulkdor ariza bilan murojaat qilsa, u reyestrdan chiqariladi. Shuningdek, qarorda sport tashkilotlari sportchilariga barcha rasmiy musobaqalarda ishtirok etish huquqi berilishi ham alohida nazarda tutilgan.
Ulashish